Wayne Rooney thotë se Henrikh Mkhitaryanin nuk iu dha hapësira e nevojshme dhe liria e veprimit te Manchester United për t’i treguar vlerat e tij.

Armeni luajti vetëm 26 ndeshje nga minuta e parë në 18 muaj sa ishte në Old Trafford, për të kaluar pastaj te Arsenal.

Jose Mourinho kishte thënë që Mkhitaryan nuk i përmbush kërkesat e tij, por Rooney deklaron se ai kishte shumë talent sa ishte në të njëjtin klub me të.

Sulmuesi ishte i ftuar në Monday Night Football, ku tha disa fjalë të bukura për armenin.

“E kam parë sezonin e shkuar në stërvitje, ai është një lojtar shumë i talentuar”.

“Unë mendoj se në Manchester United ai nuk e ka marrë lirinë që dëshiron. Ai dëshiron të luajë siç luante te Dortmund, atë stil të lojës”.

“Në Arsenal ai do të ketë lojtarë rreth tij që luajnë me topin, marrin topin dhe ai do të krijojë raste dhe do të shënojë gola”.

Mkhitaryan ka luajtur shkëlqyeshëm ndeshjen e parë si startues ndaj Everton ku fituan 5-1.